Oʻzbekiston Respublikasi Konstitutsiyasi kuni bayrami munosabati bilan Toshkent shahar hokimligi va Adliya vazirligi tomonidan hamkor tashkilotlar bilan birgalikda Toshkent shahrining “Sayilgoh” koʻchasi va barcha hududlarning markaziy koʻchalarida “Konstitutsiya koʻchasi” tashkil etiladi. Bu haqda Adliya vazirligi xabar berdi.

Tadbir doirasida:

fuqarolarning huquqiy bilim va koʻnikmalarini yanada mustahkamlash maqsadida tegishli davlat tashkilotlari tomonidan “Konstitutsiya burchaklari” tashkil etiladi;

taniqli sanʼatkorlar ishtirokida konsert, koʻngilochar-madaniy va boshqa tadbirlar boʻlib oʻtadi;

sovrinli viktorinalar oʻtkaziladi;

sayyor qabullar tashkil etiladi.

Toshkent shahridagi tadbir “Sayilgoh” koʻchasida 2025-yilning 5-dekabr kuni soat 11:00 da boshlanadi.