O‘zbekiston Markaziy banki oktyabr oyida jahon regulyatorlari orasida oltinning eng yirik xaridorlaridan biriga aylanib, oltin zaxirasini 9 tonnaga oshirdi. Bu haqda Jahon oltin kengashi (World Gold Council) xabar bermoqda.

Jahon markaziy banklari oltinning sof xaridini 53 tonnagacha oshirdi, bu sentyabr oyiga nisbatan 36 foizga ko‘pdir. Bu yil boshidan beri eng yuqori oylik ko‘rsatkichga aylandi.

WGC ma’lumotlariga ko‘ra, O‘zbekiston oktyabr oyida 9 tonna oltin sotib olib, Polsha va Braziliyadan keyin uchinchi o‘rinni egalladi (ularning har biri 16 tonnadan).

Indoneziya banki 4 tonna, Turkiya Markaziy banki 3 tonna, Chexiya va Qirg‘iziston milliy banklari 2 tonnadan, Gana, Xitoy, Qozog‘iston va Filippin banklari 1 tonnadan ortiq qimmatbaho metall xarid qildi.

Zaxiralar kamaygani haqida xabar bergan yagona markaziy bank Rossiya Markaziy banki bo‘ldi (-3 tonna).

Yil boshidan oktyabr oyigacha jahon markaziy banklari sof ko‘rsatkichda 254 tonna oltin sotib oldi. Bu avvalgi uch yilga nisbatan kamroq, buni WGC tahlilchilari yuqori narxlar ta’siri bilan izohlamoqda. Biroq rivojlanayotgan mamlakatlarning barqaror talabi xaridlarning strategik xususiyatidan dalolat beradi.

WGC’ning ta’kidlashicha, yillik so‘rov natijalari shuni ko‘rsatadiki, Markaziy banklarning 95 foizi 2026-yilda dunyodagi oltin zaxiralarining yanada o‘sishini kutmoqda.

Yil boshidan beri eng yirik xaridor Polsha Milliy banki bo‘lib qolmoqda — 83 tonna. Ikkinchi o‘rinni Qozog‘iston egalladi — 41 tonna. O‘zbekiston bo‘lsa sof savdolar bo‘yicha (10 tonnadan sal ko‘proq) Singapurdan keyin ikkinchi o‘rinda turadi.

10 oyda O‘zbekiston rekord darajadagi 9,9 mlrd dollarlik oltin eksport qildi, bu o‘tgan yilning shu davriga nisbatan 1,5 barobar ko‘pdir. Mamlakat umumiy eksportining 37,1 foizi oltinga to‘g‘ri keladi.