Vazirlar Mahkamasining “Sog‘liqni saqlash tizimini raqamlashtirish jarayonlarini yanada jadallashtirish bo‘yicha qo‘shimcha chora-tadbirlar to‘g‘risida”gi 570-son qaroriga ko‘ra,10 dekabrdan boshlab Toshkent shahri hamda Prezidentning PF-88-son Farmoniga muvofiq tajriba-sinov loyihasi amalga oshiriladigan 15 ta tuman (shahar)da, 2026 yilning yakuniga qadar esa respublikaning barcha hududlarida quyidagilar amalga oshiriladi:

— barcha tibbiyot va farmatsevtika tashkilotlari Raqamli sog‘liqni saqlash platformasiga ulanadi. Ushbu platforma amaliyotga joriy etilgunga qadar esa ular Sog‘liqni saqlash vazirligining "Elektron sog‘liqni saqlash" axborot tizimiga integratsiya asosida ulanadi. Shu orqali "Elektron poliklinika", "Elektron shifoxona", "Elektron tibbiy karta" va "Elektron retsept" modullari orqali ma’lumotlar real vaqt rejimida almashiladi. Ushbu talablar litsenziya shartlarining ajralmas qismi sifatida belgilanadi;

— retsept asosida beriladigan dori vositalarini tayinlash va chakana sotishda zarur ma’lumotlarni integratsiya orqali majburiy ravishda "Elektron retsept" moduliga kiritish tartibi joriy etiladi.

Shuningek, Qaror bilan Tibbiyot tashkilotlarida retsept bilan beriladigan dori vositalarini elektron retsept asosida tayinlash tartibi to‘g‘risidagi nizom tasdiqlandi.

Ushbu nizom retsept bilan beriladigan dori vositalarini bemorga elektron retsept asosida tayinlash, elektron retsept orqali tayinlangan dori vositalarini rasmiylashtirish, elektron retsept shakli va undagi ma’lumotlarni "Elektron retsept" moduliga uzatish tartibi va tibbiyot tashkilotlarida retsept bilan beriladigan dori vositalarini elektron retsept asosida tayinlash tartibini buzganlik uchun javobgarlikni nazarda tutadi.

2025 yil 10 dekabrdan boshlab:

— Toshkent shahri hamda Prezidentning PF-88-son Farmoniga muvofiq tajriba-sinov loyihasi amalga oshiriladigan 15 ta tuman (shahar)dagi barcha tibbiyot tashkilotlarida dori vositalarini bemorlarga tayinlashda dori vositalarining xalqaro patentlanmagan nomi bo‘yicha (agar mavjud bo‘lsa) elektron retsept rasmiylashtiriladi (alohida toifadagi kuchli ta’sir qiluvchi moddalar, tarkibida giyohvandlik vositalari va psixotrop moddalar saqlovchi dori vositalari hamda reimbursatsiya dasturi bilan bog‘liq jarayonlar bundan mustasno);

— bemorlarga tayinlangan dori vositalari to‘g‘risidagi ma’lumot (xalqaro patentlanmagan yoki original dori nomi, kunlik dozasi, qabul qilish yoki yuborish usuli, miqdori, davomiyligi) elektron retseptga bevosita shifokor tomonidan kiritiladi hamda elektron tasdiqlash usullari orqali tasdiqlanadi;

— tibbiyot tashkilotlari va dorixonalarning mavjud axborot tizimlarini Sog‘liqni saqlash vazirligining Raqamli sog‘liqni saqlash platformasiga va axborot tizimiga ulash yoki ularning so‘roviga asosan ularda vazirlikning "Elektron sog‘liqni saqlash" axborot tizimi modullari bepul o‘rnatiladi;

— tibbiyot va farmatsevtika tashkilotlari Sog‘liqni saqlash vazirligining "Elektron sog‘liqni saqlash" axborot tizimiga ulanish uchun zarur moddiy-texnik bazaga, barqaror Internet va elektr tarmog‘iga ega bo‘lishlari shart.

Ushbu qaror rasmiy e’lon qilingan kundan e’tiboran uch oy o‘tgach kuchga kiradi.