Prezidentning tegishli qarori bilan Istamov Maxmud Shuxratovich adliya vazirining birinchi o‘rinbosari lavozimiga tayinlandi.

Ma’lumot uchun, Istamov 1979-yilda Buxoro viloyati, Buxoro shahrida tug‘ilgan. Ma’lumoti oliy, huquqshunos, 1-darajali adliya maslahatchisi.

Mehnat faoliyatini 2000-yilda Adliya vazirligi Idoraviy me’yoriy hujjatlarni davlat ro‘yxatidan o‘tkazish boshqarmasi katta maslahatchisi lavozimida boshlagan. Keyinchalik mazkur boshqarmada bosh maslahatchisi, bo‘lim boshlig‘i, boshqarma boshlig‘i o‘rinbosari bo‘lgan. Shuningdek, 2021-2024-yillarda Buxoro viloyati prokurori, 2024-2025-yillarda O‘zbekiston Respublikasi Oliy Majlisi Qonunchilik palatasi Devoni rahbari lavozimida ishlagan.

Tayinlovga qadar (2025-yildan) O‘zbekiston Respublikasi adliya vazirining o‘rinbosari lavozimida faoliyat ko‘rsatgan.

Bundan tashqari, Prezidentning tegishli qarori bilan Allakuliyev Mirjalol Davranbekovich adliya vazirining o‘rinbosari lavozimiga tayinlandi.

Ma’lumot uchun, Allakuliyev 1988-yilda Xorazm viloyati, Xiva tumanida tug‘ilgan. Ma’lumoti oliy, huquqshunos, 1-darajali adliya maslahatchisi.

Mehnat faoliyatini 2008-yilda Adliya vazirligi rahbariyat qoshidagi apparatning qabulxona kotibi lavozimida boshlagan. 2018-2021-yillarda Adliya vazirligi Jinoiy, ma’muriy va ijtimoiy qonunchilik boshqarmasi boshlig‘i, 2021-2022-yillarda Adliya vazirligi Qonunchilik bosh boshqarmasi boshlig‘i lavozimlarida ishlagan.

Tayinlovga qadar (2022-yildan) Adliya vazirligi Qonunchilik departamenti boshlig‘i lavozimida faoliyat ko‘rsatgan.

Prezidentning tegishli qarori bilan Rabiyev Sherzod Mirjalilovich boshqa ishga o‘tishi munosabati bilan adliya vaziri o‘rinbosari lavozimidan ozod etildi.