5 nafar qizning ota-onasi, Kitob tumanidan boʻlgan Jasur Maqayev va Dilfuza Bahriddinova yana 4 qizlik boʻldi. Bu haqda Sogʻliqni saqlash vazirligi xabar berdi.

Shu tariqa, oiladagi qiz farzandlar soni 9 nafarga yetdi.

Egizaklar Respublika ixtisoslashtirilgan ona va bola salomatligi ilmiy-amaliy tibbiyot markazining Qashqadaryo filialida muddatidan oldin kesarcha kesish amaliyoti orqali dunyoga keldi.

- Birinchi qizaloq vazni 1400 gr, boʻyi 37 sm.

- Ikkinchi qizaloq vazni 1450 gr, boʻyi 38 sm.

- Uchinchi egizakning vazni 1600 gr, boʻyi 40 sm.

- Toʻrtinchisining vazni 1400 gr, boʻyi 37 sm.

Hozirda qizaloqlar xalqaro protokollar asosida parvarishlanayotgani qayd etilgan.