2026-yil 1-yanvardan boshlab chiqindi xizmatlari uchun toʻlovlar jismoniy va yurdik shaxslar tomonidan faqat onlayn tarzda barcha elektron toʻlov tizimlari orqali amalga oshiriladi, deb xabar berdi Chiqindilarni boshqarish va sirkulyar iqtisodiyotni rivojlantirish agentligi.

Unga koʻra, endi xizmat uchun toʻlovlarni uyma-uy undirish amaliyoti toʻxtatiladi. Mazkur chora-tadbirlar sohada aholiga qulay toʻlov tizimini yaratish, billing hisoblarini yuritishda shaffoflikni taʼminlash va korrupsion holatlarning oldini olish maqsadida amalga oshirilmoqda.

Bu borada agentlik tomonidan Qoraqalpogʻiston Respublikasi, viloyatlar hamda Toshkent shahridagi barcha sanitar tozalash korxonalariga tegishli koʻrsatmalar berilgan.

2026-yilning yanvar oyidan boshlab toʻlovlar

• - agentlikning “Toza makon” billing tizimi;
• - elektron toʻlov tizimlari;
• - internet aloqasi bilan taʼminlanmagan, hudud markazidan olis masofada joylashgan aholi yashash punktlari uchun istisno tariqasida tijorat banklari kassalari, “Oʻzbekiston pochtasi” AJ pochta boʻlimlari orqali amalga oshiriladi.

Joriy tartibga koʻra, qattiq maishiy chiqindilarni toʻplash va olib chiqish xizmatlari uchun majburiy toʻlovlar boʻyicha qarzdorligi mavjud boʻlgan isteʼmolchilar qisqa xabarnoma (SMS) orqali xabardor qilinganidan keyin mazkur qarzdorlik bartaraf etilguniga qadar ulardan elektr energiyasi uchun toʻlovlarni qabul qilish cheklanadi.

Bundan tashqari, Prezident topshirigʻiga koʻra, chiqindi mashinalarining kelish vaqti va yoʻnalishini onlayn bilishi mumkin boʻladi.