Oʻzining 10 yilligini nishonlayotgan Yevropa kinofestivali 7−9-noyabr kunlari poytaxtda va 12-noyabr kuni Termizda boʻlib oʻtadi. Bu haqda Yevropa Ittifoqining Oʻzbekistondagi vakolatxonasi xabar berdi.

Festival dasturiga 12 ta Yevropa davlatlaridan lirik dramalardan tortib, oʻzlikni anglash haqidagi ilhomlantiruvchi hayotiy tanlov va insoniy tuygʻular haqidagi hikoyalarni oʻz ichiga olgan 12 ta film kiritilgan. Bundan tashqari, ispan raqs sanʼati ixlosmandlari uchun Aire Nuevo Danza (Ispaniya) guruhi tomonidan klassik va zamonaviy raqslar bilan chiqishlar boʻladi.

Shuningdek, tadbir davomida Fransiya Alyansi tomonidan Gyote instituti va Oʻzbekiston Kino ixlosmandlari uyushmasi hamkorligida “Avlodlar” mavzusida havaskor qisqa metrajli filmlar namoyishlari oʻtkazilishi koʻzda tutilgan.

Kinofestival Yevropa Ittifoqining Oʻzbekistondagi delegatsiyasi tomonidan, Oʻzbekistonda akkreditatsiyadan oʻtgan Yevropa Ittifoqiga aʼzo davlatlar elchixonalari bilan hamkorlikda, Oʻzbekiston Madaniyat vazirligi huzuridagi Kinematografiya agentligi koʻmagida tashkil etiladi.

Namoyishlar bepul taqdim etiladi. Filmlar asl tilida, oʻzbek va/yoki rus tilidagi subtitrlar bilan taqdim etiladi.

Toshkentdagi namoyishlar quyidagi dastur asosida, Milliy kino sanʼati saroyi (Navoiy koʻchasi, 15)da boʻlib oʻtadi:

7-noyabr

• 11:00 — “Jonja” / “Yonya” (Germaniya);
• 14:00 — “Amadeo” (Portugaliya);
• 18:00 — “Roza of Smyrna” / “Smirnalik Roza” (Gretsiya).

8-noyabr

• 11:00 — “Four Souls of Coyote” / “Chiyaboʻrining Toʻrt Ruhi” (Vengriya);
• 14:00 — “Chasing Unicorns” / “Orzular izidan” (Estoniya);
• 18:00 — “Divertimento” (Fransiya).

9-noyabr

• 11:00 — “My Last Year as a Loser” / “Soʻnggi yil” (Sloveniya);
• 14:00 — “And the King Said, What a Fantastic Machine” / «Shoh va Ajoyib Mashina"(Shvetsiya);
• 18:00 — “Carmen” / “Karmen” (Malta).

Termizdagi namoyishlar dasturi — Termiz kinoteatri:

12-noyabr

• 11:00 — “Dekadentas №2419” / “Dekadent №2419” (Litva);
• 14:00 — “Gipsy Queen” / “Ringdagi Qirolicha” (Avstriya);
• 18:00 — “Divertimento” (Fransiya).