Qashqadaryoda to‘yida 14 ta qozonda osh damlagan fuqaro bazaviy hisoblash miqdorining o‘n baravari miqdorida jarimaga tortildi, deb xabar berdi Daryo nashri.

Xabarda yozilishicha, 1994-yilda tug‘ilgan, Chiroqchi tumanining “Buronjuz” mahallasida yashovchi, II guruh nogironi S.Q. 13-oktyabr kuni o‘z xonadonida to‘y marosimi o‘tkazgan.

U qarindoshlar hamda qo‘shnilar ishtirokida o‘tgan to‘yga ko‘pchilik kelgani uchun amaldagi talablardan ortiq darajada, ya’ni 14 ta katta qozonda ovqat tayyorlatgan.

Sudda u qilmishini tan olgan va pushaymonligini bildirib, yengillik berilishini so‘ragan.

Jinoyat ishlari bo‘yicha Chiroqchi tumani sudining qarori bilan S.Q. Ma’muriy javobgarlik to‘g‘risidagi kodeksning 192¹-moddasida (to‘ylar, oilaviy tantanalar va ma’raka-marosimlar tartibini buzish) nazarda tutilgan huquqbuzarlikni sodir qilgan deb topilgan va unga nisbatan bazaviy hisoblash miqdorining 10 baravari, ya’ni 4 million 120 ming so‘m miqdorida jarima jazosi tayinlagan.

Eslatma uchun, Oyina.uz ayrim marosimlarni o‘tkazish taqiqlanishi haqida xabar bergan edi. Unda dabdababozlikka yo‘l qo‘yilmasligi, to‘ylar tartibga solinishi haqida ham aytilgan.