Turkiyaning Balikesir viloyatining Sindirgi tumanida mahalliy vaqt bilan soat 22:48 da 6,1 magnitudali zilzila sodir boʻldi. Bu haqda Anadolu agentligi xabar berdi.

Turkiya Favqulodda vaziyatlar boshqarmasi (AFAD) saytida keltirilgan maʼlumotlarga koʻra, birinchi boʻlib Istanbul va Izmirda, Marmara va Egey aholi punktlarida sezilgan yer silkinishi deyarli 6 km chuqurlikda qayd etilgan.

“Sindirgida uch bino va bir doʻkon qulab tushdi. Qurbonlar haqida maʼlumotlar yoʻq, vayronalar ostida qolganlar yoʻq”, deya Turkiya Ichki ishlar vaziri Ali Yerlikaya CNN Türk telekanaliga maʼlumot bergan.

Zilzila oqibatida 22 kishi jarohatlangan, ulardan 18 nafariga tibbiy yordam koʻrsatilgan.

Balikesir provinsiyasida zilziladan keyin yana 102 ta aftershok qayd etilgan.