National Geographic jurnali oʻzining anʻanaviy “Best of the World” loyihasining 2026-yilga moʻljallangan roʻyxatini eʻlon qildi. Jurnal Xivani ushbu roʻyxatga kiritdi.

Maqola muallifi Italiyaning Milan, Filippinning Manila, Kanadaning Vankuver, Braziliyaning Rio de Janeyro va dunyoning yana boshqa shaharlari qatorida Xivani ham alohida qayd etib oʻtgan. Xorazmga tashrif buyurish uchun sabab sifatida u “Ipak yoʻli”da joylashgan shaharlar ichida ajralib turishini keltirgan.

“1990-yildan beri YUNESKOning Butunjahon merosi roʻyxatiga kiritilgan, geometrik naqshli koshinli yodgorliklar, yogʻoch ustunli masjid va hashamatli saroylar mukammal taʻmirlangan “Ichan qalʻa” qalʻasida kunlar davomida sayr qilishingiz mumkin. Lekin Xiva faqat meʻmorchilik ixlosmandlari boradigan joy emas.

Ipak yoʻlidagi shahar – Xiva kurorti akvapark va jonli shoular uchun amfiteatrga ega, u sayohatga chiqqan oilalar uchun jozibadorlikni oshiradi. Xivaning yillik tadbirlar taqvimidan Xorazm anʻanaviy raqs shakllari bayrami – “Lazgi” xalqaro raqs festivali, XIV asr shoiri, kurash chempioni va Xiva homiysi sharafiga nomlangan Pahlavon Mahmud polvonlar oʻyinlari, Xivaning sevimli mevasi sharafiga oʻtkaziladigan uch kunlik shovqin-suronli “Qovun sayli” qovun ayli festivallari oʻrin olgan”, deb yozadi maqola muallifi Sofi Ibbotson.

U, shuningdek, 2026-yilda ishga tushirilishi rejalashtirilgan Toshkent-Xiva tezyurar poyezdini qayd etib, bu turistlar uchun yoʻlni ikki baravar qisqartirishini aytgan. “Siz Toshkentdagi Chorsu bozorining mozaika gumbazlari ostida nonushta qilishingiz va Islom Xoʻja minorasi ostida shivit oshi yeyish uchun Xivaga yetib borishingiz mumkin”, deb yozadi u.