Ichki ishlar vazirligi 30-oktyabrdan 14-noyabrga qadar UNESCO Bosh konferensiyasining 43-sessiyasi o‘tkazilishi munosabati bilan Samarqandga kirish yo‘llari yopilishi haqida ogohlantirdi.

Qayd etilishicha, tranzit transport vositalari uchun aylanma yo‘nalishlar yaratilgan bo‘lib, haydovchilarga aylanma yo‘l xaritalarini ko‘rish imkonini beruvchi QR-kodli flayerlar tarqatilgan.

Vazirlik shuningdek, O‘zbekiston aholisi va mehmonlarini Samarqandga safarlarni imkon qadar keyinroqqa qoldirishni tavsiya qilgan:

“Mazkur kunlarda Samarqandga safar rejalashtirgan bo‘lsangiz, imkon bo‘lsa, tashrifni boshqa kunga qoldiring. Bu choralar xalqaro anjumanni xavfsiz o‘tkazish uchun zarur”.

Maʼlumot uchun, UNESCO konferensiyasi 1985-yildan buyon ilk bor Parijdan tashqarida, Silk Road Samarkand sayyohlik majmuasida o‘tkaziladi.