Jahon sogʻliqni saqlash tashkiloti (JSST) Hindistonda aniqlangan xavfli suyuq dori vositalari haqida ogohlantirdi.

Hindistonning dori standartlarini nazorat qilish boʻyicha markaziy tashkiloti JSSTga kamida uchta suyuq dori vositasida dietilenglikol (texnik spirt) mavjudligini maʻlum qildi. Ularni qabul qilish oqibatida mamlakatda kamida 17 bola halok boʻlgan edi.

Maʻlum boʻlishicha, Sresan Pharmaceutical, Rednex Pharmaceuticals va Shape Pharma tomonidan ishlab chiqarilgan Coldrif, Respifresh TR va ReLife kabi preparatlarning baʻzi partiyalari xavf tugʻdiradi.

Hindiston davlat organlari ushbu dori vositalarini ishlab chiqarishni zudlik bilan toʻxtatish toʻgʻrisida buyruq bergan va ularga berilgan ruxsatnomalarni qaytarib olgan.

Hindiston kasalliklarni nazorat qilish va oldini olish komissiyasi JSSTga yuqoridagi dorilarning hech biri mamlakatdan eksport qilinmagani va hozir noqonuniy eksport haqida maʻlumot yoʻqligini maʻlum qildi. Shunga qaramay, JSST ushbu sifatsiz mahsulotlar taʻsir qilishi mumkin boʻlgan mamlakatlar va mintaqalarda taʻminot zanjirlarini nazorat qilish va tekshirishni kuchaytirishni tavsiya qildi. Shuningdek, bozor ustidan nazoratni kuchaytirish boʻyicha maslahat berildi.

Milliy tartibga soluvchi organlar, sogʻliqni saqlash organlari va huquqni muhofaza qilish organlariga ushbu mahsulotlar oʻz mamlakatida aniqlangan taqdirda darhol JSSTni xabardor qilish tavsiya etiladi.

Oktabr oyi boshida Hindistonda politsiya Madxya-Pradesh shtatida 17 nafar besh yoshgacha boʻlgan bolalar vafot etganidan soʻng Coldrif yoʻtal siropi ishlab chiqaruvchi Sresan Pharmaceutical farmatsevtika kompaniyasi egasini hibsga oldi.

2022-2023-yillarda Oʻzbekistonda Hindistonning Marion Biotech farmatsevtika kompaniyasining yoʻtalga qarshi “Dok-1 Maks” siropini qabul qilgandan soʻng, 68 nafar bola oʻtkir buyrak yetishmovchiligidan vafot etgan edi.