Oʻzbekistonda chet el fuqarolari uchun maxsus soliq rejimi joriy etiladi. Bu haqda Oʻzbekiston Respublikasi Prezidentining 4-oktyabrdagi farmoni [PF-180-son]ga tayanib Adliya vazirligining Huquqiy axborot telegram kanali maʼlum qildi.

Unga koʻra, 2026-yil 1-yanvardan quyidagi shartlarga javob beradigan chet el fuqarolarining Oʻzbekiston hududidan tashqaridagi manbalardan olingan daromadlarini jismoniy shaxslardan olinadigan daromad soligʻidan ozod qilishni nazarda tutuvchi chet el fuqarolarining daromadlarini soliqqa tortishning maxsus soliq rejimi joriy etiladi:

• 50 ming AQSH dollari miqdorida maxsus yigʻim toʻlash;
• Oʻzbekistondagi maxsus vakolatli tijorat bankida bank hisobvaragʻini yoki maxsus vakolatli kripto-birjada kripto-hamyon ochish.

Ketma-ket 12 oylik davr davomida jami 30 kalendar kundan koʻproq Oʻzbekiston Respublikasida haqiqatda boʻlgan jismoniy shaxslar ular mulk yoki ijara huquqi asosida Oʻzbekiston Respublikasi hududida turar joy koʻchmas mulk obyektiga ega boʻlganda Oʻzbekiston Respublikasining soliq rezidentlari deb eʼtirof etiladi.