2025-yil 7-oktabrdan boshlab Shota Rustaveli ko‘chasida markaziy avtobus yo‘lagi faoliyati yo‘lga qo‘yilmoqda, deb xabar berdi Тоshkent shahar transport bosh boshqarmasi.

Unga ko‘ra, birinchi bosqichda ushbu yo‘lak orqali 38-, 57- va 58-sonli avtobus yo‘nalishlari harakatlanadi.

Ushbu loyiha jamoat transportiga ustuvorlik berish, tirbandliklarni kamaytirish va yo‘lovchilar uchun qulay hamda xavfsiz sharoit yaratishni maqsad qilgan.

Boshqarma xabarida ushbu hududda harakatlanish bo‘yicha qisqa qo‘llanma keltiriladi:

Yo‘lovchilar uchun:

— Avtobuslar endi yo‘lning o‘rta qismidagi maxsus ajratilgan yo‘lak orqali harakatlanadi.
— Yo‘lovchilar avtobusga chiqish va tushishni yo‘l o‘rtasida joylashgan maxsus platformalardagi bekatlarda amalga oshiradilar.
— Platformaga faqat belgilangan piyodalar o‘tish joylari orqali chiqing, belgilnanmagan joydan o‘tish qat’iyan man etiladi.
— Avtobusni faqat old tomonidan aylanib o‘ting. Yo‘lovchilar yo‘lni faqat belgilangan piyodalar o‘tish joylari orqali kesib o‘tishlari mumkin.
— Platformada sariq xavfsizlik chizig‘i ortida turing, avtobus to‘liq to‘xtagachgina eshikka yaqinlashing.
— Avval keksalar, nogironligi bo‘lgan shaxslar va bolali yo‘lovchilarga yo‘l bering.
— Bekat atrofida to‘xtab, suratga olish yoki telefondan foydalanishda ehtiyot bo‘ling — xavfsizlikni unutmang.

Haydovchilar uchun:

— Shota Rustaveli ko‘chasining o‘rta yo‘lagi faqat avtobuslar harakati uchun mo‘ljallangan.
— Bu yo‘lakda boshqa transport vositalarining harakatlanishi, to‘xtashi yoki yo‘lni kesib o‘tishi qat’iyan taqiqlanadi.
— Markaziy yo‘lakda avtobuslarga ustuvorlik beriladi. Ruxsat etilgan kesishmalarda avtobus harakatiga yo‘l bering.
— Ikki yo‘nalishda ham chapga burilish va ortga qayrilib olish taqiqlangan.
— Chapga burilish yoki qayrilish zarur bo‘lgan haydovchilar belgilangan chorrahalar orqali harakatlanishlari lozim.

Xabarda shuningdek, barcha yo‘l harakati ishtirokchilaridan hamkorlik, ehtiyotkorlik va madaniyatli harakatlanish so‘ralgan.