O‘zbekistonda xizmat ko‘rsatgan irrigator, suv xo‘jaligi sohasining mutaxassisi, 1990-yillarda qishloq xo‘jaligi va suv resurslari sohasida yuqori lavozimlarda ishlagan, xususan vazir va prezident maslahatchisi bo‘lgan Ismoil Jo‘rabekov kecha – 28-sentyabr kuni 94 yoshda vafot etdi.

Ma’lumot uchun, Ismoil Hakimovich Jo‘rabekov 1931-yil 12-sentyabrda Samarqand viloyatida tug‘ilgan.

U mustaqillikning ilk yillarida agrosanoat sohasini boshqargan, fuqaro muhofazasi ishlari bo‘yicha vazir bo‘lgan.

Shuningdek, 1994–1998-yillarda bosh vazir o‘rinbosari – qishloq va suv xo‘jaligi vaziri bo‘lib ishlagan, 2000–2004-yillarda esa O‘zbekiston prezidentining qishloq xo‘jaligi masalalari bo‘yicha davlat maslahatchisi lavozimlarida faoliyat yuritgan.

Faoliyatidagi uzoq yillik tanaffusdan keyin 2021-yilda suv xo‘jaligi vaziri maslahatchisi sifatida davlat ishiga qaytgan edi.

Jo‘rabekov “Buyuk xizmatlari uchun” hamda “Do‘stlik” ordenlari bilan taqdirlangan.