Ai-80 benzini 2025-yilning 2-sentyabr sanasidan boshlab birja orqali sotilmaydi, Bu haqda “Oʻzbekneftgaz” AJ axborot xizmati maʼlum qildi.

Unga ko‘ra, Prezident Shavkat Mirziyoyevning ““O‘zbekiston – 2030” strategiyasini “Atrof-muhitni asrash va “yashil iqtisodiyot” yilida amalga oshirishga oid davlat dasturi to‘g‘risida”gi Farmoni ijrosiga muvofiq, “O‘zbekneftgaz” AJ tomonidan bosqichma-bosqich yuqori oktanli (Ai-92) avtobenzin ishlab chiqarishga o‘tish va sentyabr oyidan boshlab birja savdolariga faqat yuqori oktanli avtobenzin joylashtirilishi rejalashtirilgan.

Shu sababli “O‘zbekneftgaz” AJ 2025 yil 2 sentyabrdan boshlab, Ai-80 benzinini birja savdolari orqali sotishni to‘xtatdi.

O‘z navbatida Ai-92 rusumidagi avtobenzinning birja savdolariga chiqarish hajmlari oshirildi. Shu vaqtga qadar 1000 tonna Ai-92 benzini savdolarga qo‘yilgan bo‘lsa, bugungi kunda bu raqam 1720 tonnani tashkil etmoqda. Ichki bozor talabidan kelib chiqib, hajm oshirish imkoniyati mavjud.

Avgust oyida tadbirkor iste’molchilar tomonidan xarid qilingan Ai-80 rusumidagi avtobenzin hajmlari majburiyat va mavjud qoldiqlar doirasida sentyabr oyida ham o‘z egalariga yetkazib berilishi ma’lum qilinadi.