Shota Rustaveli ko‘chasini keng ko‘lamli qayta qurish va ta’mirlash doirasida yo‘l ishlarining asosiy bosqichlaridan biri yakunlanmoqda, deb xabar berdi Toshkent shahar hokimligi.

Unga ko‘ra, "Oybek" metro bekatidan "Birodarlik qabrlari" yodgorligiga qadar bo‘lgan qismda asfalt-beton qoplamaning birinchi qatlami to‘liq yotqizilgan. Hozirda yotqizilgan birinchi qatlam tabiiy texnik va fizik jarayonlardan, xususan zichlanish, cho‘kish va boshqa jarayonlardan o‘tmoqda. Bu jarayonlar yo‘l qoplamasining kelajakdagi mustahkamligi va uzoq muddat xizmat qilishini ta’minlaydi. Shundan keyin ikkinchi qatlam asfalt yotqiziladi.

10-sentyabrgacha birinchi qatlam bo‘ylab transport vositalari harakati yo‘lga qo‘yiladi. Yo‘lning ochilishi haqida rasmiy manbalar orqali qo‘shimcha ma’lumot beriladi.

Bundan tashqari, yangi intellektual tizimga ega svetofor majmualarini o‘rnatish yakuniy bosqichga kirib bormoqda. Kommunal xizmatlar kelgusida avtomobil yo‘lida takroriy aralashuvlar bo‘lmasligi uchun zarur ishlarni bir vaqtning o‘zida bajarmoqda.

Pudratchi tashkilotlar ushbu hududda ishlarni davom ettiradi.

Hokimlik axborotiga ko‘ra, ayni paytda, "Birodarlik qabrlari" yodgorligidan "O‘zgarish" ko‘prigi tomon yo‘lning keyingi qismida ham ishlar faol olib borilmoqda. Bu yerda drenaj tizimlarini o‘rnatish, suv chiqarish lotoklarini yotqizish, yo‘l chetidagi toshlarni almashtirish, veloyo‘lak qurish, jamoat transporti uchun alohida harakat yo‘lagini tashkil etish va boshqa zarur ishlar amalga oshirilmoqda.