Joriy yilning 24-oktyabr kuni Oʻzbekiston va Yevropa Ittifoqi tomonidan kengaytirilgan hamkorlik toʻgʻrisidagi shartnoma imzolanishi rejalashtirilmoqda. Bu haqda Yevropa Kengashi raisi Antoniu Koshta Oʻzbekiston prezidentiga yoʻllagan tabrik muaktubida maʼlum qilingan.

“Siz bilan 2025-yil 24-oktyabr kuni Bryusselda uchrashishni intizorlik bilan kutmoqdaman. U yerda Yevropa Ittifoqi va Oʻzbekiston oʻrtasidagi Kengaytirilgan sheriklik va hamkorlik toʻgʻrisidagi bitimni imzolash munosabati bilan fikr almashishni davom ettirish imkoniyatiga ega boʻlamiz”, deyiladi tabrik maktubida.

Yangi kelishuv 1999-yildan buyon amalda boʻlgan eski shartnoma oʻrnini egallashi kutilmoqda. Ushbu masala yuzasidan muzokaralar 2019-yilda boshlanib, 2022-yilda yakunlangan. Bitim keng qamrovli masalalarni, jumladan, savdo toʻgʻrisidagi qoidalar, texnik tartibga solish, sanitariya choralari va boshqa sohalarni oʻz ichiga oladi.