Latviya Imigratsiya toʻgʻrisidagi qonuniga oʻzgartishlar kiritildi. Bu haqda “Dunyo” axborot agentligi xabar berdi.

Yangi tartibga bilan joriy yilning 1-sentyabrdan boshlab Yevropa Ittifoqining boshqa davlatlari tomonidan berilgan shengen viza yoki yashash guvohnomasi bilan Latviyaga tashrif buyuradigan uchinchi davlat fuqarolari, jumladan, Oʻzbekiston fuqarolari uchun avvaldan xabardor qilish tartibi joriy etilmoqda.

Unga koʻra, Latviya tomonidan rasmiylashtirilgan viza yoki yashash guvohnomasi boʻlmagan uchinchi davlat fuqarolari Latviyaga safar qilishdan kamida 48 soat avval “eta.gov.lv” sayti orqali oʻzlari haqida tegishli maʼlumotlarni taqdim etishi kerak. Bu majburiyat Latviya orqali tranzit harakatlanuvchi shaxslarga ham tadbiq etiladi.

Latviyaga tashrif buyuruvchi shaxs shaxsan oʻzi “eta.gov.lv” sayti orqali soʻralgan maʼlumotlarni taqdim etadi hamda tegishli tasdiq elektron manziliga kelib tushishini kutishi lozim.

Latviya IIV rasmiy saytida eʼlon qilinishicha, taqdim etilishi lozim boʻlgan maʼlumotlarga quyidagilar kiradi:

- safar (kirish) maqsadi;

- rejalashtirilgan turish vaqti va joyi;

- safar yoʻnalishi;

- aloqa maʼlumotlari;

- shaxs yoki uning qarindoshi egallab turgan saylanadigan lavozimlarda faoliyat yuritishi;

- saylovda nomzod sifatida qatnashganligi;

- davlat yoki mahalliy hokimiyat organlarida amaldorlik (hozirgi yoki sobiq) maqomi;

-Qurolli kuchlar, maxsus xizmatlar, chegara qoʻshinlari, bojxona, ichki ishlar, adliya yoki tashqi ishlar (shu jumladan diplomatik) xizmatlarda faoliyat olib borganlik haqidagi maʼlumotlar.

Latviya IIVga koʻra, agar xorijlik ushbu maʼlumotlarni taqdim etmasa yoki notoʻgʻri/toʻliq boʻlmagan maʼlumot bersa, maʼmuriy javobgarlikka tortiladi.

Yangi kirish tartibi diplomatik immunitetga ega shaxslarga, rasmiy vazifalarni bajarish yoki texnik qoʻllab-quvvatlash maqsadida qisqa muddatga Latviyaga kelayotgan shaxslarga taalluqli emas.