“Yangi O‘zbekiston” bog‘ida mamlakatimiz davlat mustaqilligining 34-yilligiga bag‘ishlangan bayram tadbiri bo‘lib o‘tdi. Marosimda O‘zbekiston Respublikasi Prezidenti Shavkat Mirziyoyev nutq so‘zladi.

Davlat rahbari ko‘p millatli xalqimizni, xorijdagi vatandoshlarimizni Istiqlol bayrami bilan tabrikladi.

“Inson qadri uchun, inson baxti uchun” degan ezgu tamoyilga asoslangan Yangi O‘zbekiston g‘oyasi amalda qudratli harakatga aylandi. Dunyodagi murakkab vaziyatga qaramasdan, iqtisodiyotimiz 6 foizdan yuqori sur’atlarda barqaror o‘sayotgani xalqimiz o‘zi tanlagan yo‘ldan dadil borayotganini ko‘rsatmoqda.

Yurtimiz aholisi yiliga o‘rtacha 700-800 mingga ko‘paymoqda. Mehnat bozoriga har yili 500-600 ming yosh kirib kelmoqda. Buncha odamni o‘qitish, kasb-hunarli qilish, ularga ish topish o‘z-o‘zidan bo‘lib qolmaydi. Buning uchun, muntazam ishlaydigan tizim, kafolatli investitsiya va infratuzilma kerak. Shuni oldindan chuqur o‘ylab, biz bu yo‘nalishda aniq dasturlarni qabul qildik”.

Davlatimiz rahbari Yangi O‘zbekistonda tadbirkorlik iqtisodiyotni harakatga keltiruvchi, oldinga boshlovchi katta kuchga aylanganini ta’kidladi.

“Keyingi sakkiz yilda yalpi ichki mahsulotimiz 2 karra oshib, o‘tgan yili 115 milliard dollarga, eksport hajmi 26 milliard dollarga yetdi. Yil yakuni bilan yalpi ichki mahsulotimiz 130 milliard dollar bo‘ladi.

Oltin-valyuta zaxiralarimiz tariximizda ilk bor 48 milliard dollardan oshdi. O‘tgan sakkiz yilda yurtimizga qariyb 130 milliard dollar xorijiy investitsiyalar kirib keldi. Bularning barchasi islohotlar samarasi, taraqqiyotimizning mustahkam kafolati, nufuzli moliya institutlari va xorijiy kompaniyalarning yuksak ishonchi tufaylidir.

 “Xalqimizning ko‘z o‘ngida minglab zamonaviy korxonalar, ijtimoiy-iqtisodiy infratuzilma obyektlari qad rostlamoqda. E’tibor bering, bu yil jami 35 milliard dollar investitsiya evaziga 9 mingga yaqin yangi korxona, xizmat ko‘rsatish majmualari barpo etiladi. Eng ulug‘ bayramimiz arafasida 4 milliard dollarlik 79 ta yirik obyekt ishga tushirildi.

O‘tgan davrda birgina kichik va o‘rta tadbirkorlar soni 2 karra ko‘paydi. Bugun ushbu tarmoqda 10 milliondan ortiq aholimiz mehnat qilib, daromad topmoqda. Biz yil boshida 5,5 million aholi bandligini ta’minlash bo‘yicha katta marra olgan edik. Sakkiz oydayoq 5 millionlik rejani uddaladik. Eng muhimi, islohotlarimizga ishonib, shu yilning o‘zida chetda ishlayotgan 700 ming fuqaromiz yurtimizga, o‘z oilasi bag‘riga qaytdi”, dedi Prezident.

Iqtisodiyotimiz rivojlanishi, aholimiz ko‘payishi bilan xavfsiz va barqaror energiya resurslariga talab ortmoqda. O‘tgan sakkiz yilda iste’molchilar soni 25 foizga, ya’ni qo‘shimcha 1 million 600 mingtaga, iste’mol hajmi esa 54 foizga yoki qo‘shimcha 25 milliard kilovatt-soatga oshdi. Shuning uchun “yashil” energiya ulushini oshirish bo‘yicha misli ko‘rilmagan qadamlar qo‘yilgani ta’kidlandi.

Natijada elektr ishlab chiqarish quvvatlari 2016-yildagi 59 milliard kilovatt-soatdan 85 milliard kilovatt-soatga yetdi, kelasi yilda bu 97 milliard kilovatt-soatdan ziyodni tashkil etadi. Shu yilning o‘zida 6,5 milliard kilovatt-soat “yashil” energiya ishlab chiqarildi. Eng muhimi, jami generatsiya quvvatlarida “yashil” energiya ulushi 30 foizga yetdi.

2030-yilgacha yana 35 milliard dollar to‘g‘ridan to‘g‘ri investitsiya hisobidan “yashil” energiya ulushi 54 foizga olib chiqilishi qayd etildi.

 “Tabiatga mehrli munosabat orqali kelajak avlodlarga unumdor yer, zilol suv, musaffo havoga ega bo‘lgan go‘zal Vatanni meros qilib qoldirishni muqaddas burchimiz, deb bilamiz.

Shu maqsadda “Yashil makon” umummilliy loyihasi doirasidagi ishlarimizni yanada kengaytiramiz”, dedi Prezident.

2030-yilgacha butun dunyoda qo‘llanayotgan “yashil shahar” standartlari asosida barcha shaharlarimizda yashillik darajasi 30 foizga yetkaziladi. Natijada mamlakatimiz barqaror energiya bilan ta’minlanadi, ekologiyaga, odamlarimiz salomatligiga zararli ta’sirlar keskin kamayadi.

Bu yilning o‘zida yordamga muhtoj aholini ijtimoiy himoya qilishga 19 trillion so‘m mablag‘ yo‘naltirilmoqda. Bularning barchasi o‘z samarasini berib, yurtimizda kambag‘allik darajasini 6,8 foizga tushirishga erishildi. Xalqaro tashkilotlar besh-olti yil oldin ushbu raqamni 35 foiz atrofida baholaganini hisobga olsak, qisqa davrda bu borada qanday katta yo‘lni bosib o‘tganimiz yaqqol ayon bo‘ladi.

Sifatli ta’lim-tarbiya, aholi salomatligi kelgusi taraqqiyotimizni hal qiladigan eng muhim masala ekani ta’kidlandi. So‘nggi sakkiz yilda xususiy sektor bilan birga bog‘chalardagi o‘rinlar ikki yarim millionga, qamrov 78 foizga yetkazildi. Yangi maktablar qurilgani, borlari kengaytirilgani hisobiga qo‘shimcha 1 millionta o‘quvchi o‘rni yaratildi. Shu davrda oliy ta’limda ham keskin burilish yasalib, qamrov 9 foizdan 42 foizga yetkazildi. Ayniqsa, talabalarning 53 foizini xotin-qizlarimiz tashkil etayotgani alohida e’tiborga sazovor.

Hozirgi vaqtda dunyodagi top oliygohlarda 2 mingdan ziyod talabalarimiz tahsil olmoqda. Ulardan 750 nafari “El-yurt umidi” jamg‘armasi orqali davlat hisobidan o‘qimoqda.

Prezident “O‘tgan yili yurtimiz yoshlari TOP-500 talik oliygohlarga kirish bo‘yicha Markaziy Osiyoda birinchi o‘rinni egallagani barchamizni albatta quvontiradi. Ayniqsa, farzandlari dunyodagi eng nufuzli universitetlarda ta’lim olayotgan ota-onalarning xursandchiligini so‘z bilan ifoda qilib bo‘lmaydi”, deya ta’kidladi.

So‘nggi yillarda tibbiyot uchun mablag‘lar 6 karra oshirildi, sifatli tibbiy xizmatlar mahallagacha tushirildi. Odamlarimiz yuqori texnologik tibbiy xizmatlar uchun oldin faqat poytaxtga kelardi. Hozir bunday amaliyotlarning 400 dan ortig‘i viloyat va tumanlarning o‘zida bajarilmoqda. Aholining turmush sharoitlari yaxshilanib borayotgani natijasida o‘rtacha umr ko‘rish darajasi 73,8 yoshdan 75,1 yoshga uzaydi.

“Bugungi unutilmas damlarda men butun O‘zbekiston yoshlariga qarata aytmoqchiman. Aziz farzandlarim, doimo yodda tuting: baxt – intilganniki, g‘alaba – kurashganniki. Kelajakni mardlar, tarixni g‘oliblar yaratadi. Hamisha oldinga qarab intiling, bahodir o‘g‘lonlarim, oqila qizlarim! Sizlarning ezgu ishlaringizda Vatan, xalq, Prezident barchangizga hamisha tayanch va suyanch bo‘ladi”, dedi Prezident.

Davlatimiz rahbari O‘zbekistonning tashqi siyosat borasidagi pozitsiyasini yana bir bor ta’kidladi: “Afg‘oniston mintaqaviy va global xavfsizlikning muhim omili ekanidan kelib chiqib, ushbu mamlakatning hukumati bilan konstruktiv va amaliy hamkorlik olib borish zarur, deb bilamiz.

Biz Falastin xalqi Birlashgan Millatlar Tashkiloti rezolyutsiyalari bilan tasdiqlangan huquqqa, ya’ni o‘zining mustaqil davlatini barpo etish huquqiga ega, degan qat’iy pozitsiyamizni yana bir bor bildiramiz”.

“Boshlagan buyuk ishlarimizni albatta oxiriga yetkazamiz. Hech qachon unutmaylik: biz barchamiz bitta xalq, bitta mamlakat, bitta oilamiz! Hammamizning taqdirimiz, kelajagimiz, baxtimiz va yutug‘imiz ham yagona va mushtarak. Har bir vatandoshimning yutug‘i – bu mening yutug‘im, tashvishi – mening tashvishim, degan fikr bilan yashasak, yutug‘imiz ko‘payib, tashvishimiz albatta kamayib boradi. Afsuski, dunyoda turli tahdid va xatarlar ko‘p. Ammo ularga qarshi birgalikda, bir tanu bir jon bo‘lib kurashsak, albatta yengamiz. Bu ulug‘ ayyomda Yangi O‘zbekistonni barpo etishdek olijanob ishga munosib hissa qo‘shayotgan barcha-barcha insonlarga, mehnatkash, bag‘rikeng xalqimizga minnatdorlik bildirib, chin qalbimdan ta’zim qilaman.Har bir inson, har bir oilaga tinchlik va xotirjamlik, qut-baraka, baxt-saodat hamisha yor bo‘lsin!

Yashasin O‘zbekiston davlati! Yashasin O‘zbekiston xalqi!”, deya Prezident o‘z nutqini yakunladi.