Qirgʻiziston prezidenti Sadir Japarov “Tibbiyot sohasida mutaxassislar tayyorlashda davlat monopoliyasini joriy etish toʻgʻrisida“gi farmonni imzoladi, deb xabar beradi Prezident matbuot xizmati.

Hujjat tibbiyot va farmatsevtika sohasi kadrlarini tayyorlash tizimini tubdan takomillashtirish, ularni qayta tayyorlash va malakasini oshirishga, shuningdek, sogʻliqni saqlash tizimidagi ustuvor muammolar boʻyicha keng qamrovli ilmiy tadqiqotlar olib borish, taʼlim tashkilotlari resurslaridan samarali foydalanish va ularning moddiy-texnik bazasini mustahkamlashga qaratilgan.

Qayd etilishicha, soʻngi yillarda taʼlim faoliyatini amalga oshirish litsenziyasiga ega xususiy tibbiyot muassasalari jadal suratlarda ortib bormoqda. Biroq ularning barchasida ham zarur klinik baza mavjud emas. Pedagoglar tarkibi boʻlsa malaka talablariga javob bermaydi. Oʻqitish minimal amaliy tayyorgarlik va rasmiy diplom berish bilan cheklanadi.

Buning oqibatida har yili yetarli bilim va amaliy koʻnikmalarga ega boʻlmagan yuzlab mutaxassislar yetishib chiqadi, mamlakat tibbiy taʼlim tizimiga boʻlgan ishonch susayib, qirgʻiz diplomining xalqaro makondagi obroʻsiga putur yetadi.

Bu holat tibbiyot mutaxassislarini tayyorlashda tizimli inqirozlarga olib keladi, mamlakat sogʻliqni saqlash tizimida kadrlar yetishmovchiligi kuchayadi. Bu esa milliy xavfsizlikka xavf solib, noqonuniy migratsiya va chet ellik talabalarning noqonuniy ishlash holatlarini ortishiga sabab boʻladi.

Prezident farmoni bilan:

• - I. K. Axunbayev nomidagi Qirgʻiziston davlat tibbiyot akademiyasiga oliy tibbiy va farmatsevtika maʼlumotiga ega boʻlgan mutaxassislarni tayyorlash, tibbiyot va ilmiy kadrlarni qayta tayyorlash va ularning malakasini oshirish boʻyicha mutlaq huquqqa ega boʻlgan tizimni shakllantiruvchi davlat oliy taʼlim muassasasi maqomini berib, meditsina sohasida mutaxassislar tayyorlash boʻyicha davlat monopoliyasini joriy etish;
• - tibbiyot oliy taʼlim tashkilotlarining davlat akkreditatsiyasini tasdiqlash;
• - tibbiyot mutaxassisliklari boʻyicha yagona davlat taʼlim standartini joriy etish;
• - davlat tibbiyot muassasalarida taʼlim taraqqiyotining klinik amaliyot bilan uzviy bogʻliqligini taʼminlash;
• - tibbiy taʼlim tizimida korrupsiyaviy xavflarni minimallashtirish va shaffoflikni oshirish;
• - xususiy tibbiyot oliy taʼlim muassasalarining litsenziya, akkreditatsiya va malaka talablariga muvofiqligini, shu jumladan, kadrlar tarkibi va ularning malaka standartlariga muvofiqligini, klinik bazalarning mavjudligi va holatini, oʻquv va moddiy-texnika infratuzilmasini oʻrganish uchun davlat organlari vakillari ishtirokida idoralararo komissiya tuzish nazarda tutilgan.