Ijtimoiy tarmoqlarda Jizzax viloyatida yashovchi fuqaro S.Sh oilaviy nizo oqibatida 2 nafar farzandiga nisbatan jismoniy zo‘ravonlik harakatlarini sodir etgani tasvirlangan videolar tarqaldi. Bolalar ombudsmani, Ijtimoiy himoya milliy agentligi va Ichki ishlar vazirligi holat yuzasidan birgalikda tekshiruv o‘tkazmoqda.

Ombudsman axborotiga ko‘ra, oilaviy nizo oqibatida ota 2 nafar farzandiga: 14 yoshli qizi va 12 yoshli o‘g‘liga jismoniy zo‘ravonlik qilgan.

Viloyat IIB xabar qilishicha, hozirda ushbu holat yuzasidan Jinoyat kodeksining 110- moddasi 2- qismi “a” bandi bilan jinoyat ishi qoʻzgʻatilib, gumon qilinuvchining xatti-harakatlariga huquqiy baho berish choralari koʻrilmoqda.

Bolalar esa ichki ishlar organlari voyaga yetmaganlarga ijtimoiy-huquqiy yordam koʻrsatish markaziga joylashtirilgan. Ularga psixologik va ijtimoiy yordam ko‘rsatilmoqda. Mutasaddi idoralar holat bo‘yicha qo‘shimcha axborot berilishini ma’lum qildi.