Iqtisodiyot va moliya vazirligi fuqarolarni “Open byudjet”ga ovoz berish bilan bog‘liq firibgarlikdan ogohlantirdi.

Qayd qilinishicha, so‘nggi vaqtlarda ijtimoiy tarmoqlarda norasmiy Telegram botlari orqali “Tashabbusli byudjet” jarayonlarida ovoz berish evaziga pul mukofotlari taklif etish holatlari keng tarqalib, turli bahs va munozaralarga sabab bo‘lmoqda. Xususan, va’da qilingan mablag‘lar berilmayotgani bo‘yicha vazirlikka yuzlab murojaatlar kelib tushmoqda.

Ushbu holatda uchinchi shaxslar loyihalarga ovoz to‘plash maqsadida pul mablag‘lari yoki moddiy qiymatliliklar va’da qilgan holda fuqarolardan ovoz to‘plab, keyinchalik mukofotlarni bermasligi holatlari kuzatilmoqda.

Vazirlik “Tashabbusli budjet” jarayonlarida ovoz berish faqatgina “Ochiq byudjet” axborot portali, portalning Android va iOS tizimlarida ishlovchi mobil ilovalari hamda Telegramdagi rasmiy bot  orqali amalga oshirilishini, bunda, amaldagi tartibga ko‘ra, berilgan ovozlar uchun hech qanday to‘lov talab etilmasligi bilan bir qatorda hech qanday moddiy rag‘batlantirishlar ham nazarda tutilmaganini ma’lum qildi.

“Mukofotlar uchun emas, o‘zgarishlar uchun ovoz bering. Shaxsiy ma’lumotlaringizni hech kimga taqdim etmang. Firibgarlar tuzog‘iga tushib qolmang”, deya ogohlantirdi Iqtisodiyot va moliya vazirligi.

“Tashabbusli byudjet” jarayonining 2025-yilgi 2-mavsumi doirasida ovoz berish bosqichi 22-avgustdan boshlangan. U 31-avgust kuni soat 23:59 ga qadar davom etadi.