O‘zbekistonda 2025-yil 1-noyabrdan ishsizlik nafaqasini to‘lash tartibi o‘zgarmoqda.

Qayd etilishicha, ishsizlik nafaqasi faqat mehnat shartnomasi bekor qilingan shaxslarga to‘lanadi. Endi ishsizlik nafaqasi so‘nggi 5 yilda kamida 18 oy ishlagan shaxslarga beriladi. Buning uchun ular mehnat shartnomasi bekor qilingandan so‘ng 6 oy ichida murojaat qilishi lozim.

Nafaqa oxirgi 18 oylik o‘rtacha ish haqi hisobidan 3 oy davomida to‘lanadi. 1-oyda o‘rtacha oylik ish haqining 75 foizi, lekin mehnatga haq to‘lashning eng kam miqdorining 3 baravaridan oshmagan miqdorda, 2- va 3-oylarda esa o‘rtacha oylik ish haqining 50 foizi, lekin mehnatga haq to‘lashning eng kam miqdorining 3 baravaridan oshmagan miqdorda to‘lanadi.

Ishsizlik nafaqasini takroran belgilashda dastlabki tayinlangan nafaqani olish muddati tugagandan so‘ng, qo‘shimcha ravishda kamida 12 oylik ish staji talab etiladi.