Kuzatuv kengashi qarori bilan tadbirkor Bahodir Tojimirzayevich Abdullayev “Oʻzmetkombinat” boshqaruvi raisi – bosh direktor vazifasini bajaruvchi etib tayinlandi. Bu haqda Savdo-sanoat palatasi xabar berdi.

Abdullayev 2024-yil oktabr oyida korxonaga rahbar boʻlgan Dilshod Ahmedov oʻrnini egalladi.

U 1967-yil 5-dekabrda Andijon viloyatining Shahrixon shahrida tugʻilgan. Oliy maʻlumotga ega. Bahodir Abdullayev tadbirkor hisoblanadi — tarkibida 20 dan ortiq korxonani birlashtirgan BA Holding taʻsischisi. 2022-yilda Tadbirkorlar kuni munosabati bilan “Mehnat shuhrati” ordeni bilan taqdirlangan.