O‘zbekiston milliy terma jamoasi hujumchisi Eldor Shomurodov “Roma”ni tark etib, Turkiyaning “Bashakshehir” jamoasi futbolchisiga aylandi. U bilan 2025−2026-yilgi mavsum yakuniga qadar sotib olish opsiyasi bilan ijara asosida kelishuv imzolandi.

O‘zbekiston milliy terma jamoasi hujumchisi, 30 yoshli Eldor Shomurodov Turkiyaning “Istanbul Bashakshehir” jamoasi futbolchisiga aylandi. U endi to‘q sariq-havorang libosli jamoa safida o‘ynaydi.

“Klubimiz Italiyaning “Roma“ jamoasi futbolchisi Eldor Shomurodov bilan 2025−2026-yilgi mavsum yakuniga qadar sotib olish opsiyasi bilan ijara asosida kelishuv imzoladi”, deyiladi “Bashakshehir” xabarida.

Jamoa 2024-2025 mavsumda Turkiya Superligasida 5-o‘rinni egallab, Konferensiyalar ligasiga yo‘l olgan.

Transfermarkt ma’lumotiga ko‘ra, shartnoma muddati 2026-yil 30-iyungacha. Futbolchining joriy bahosi 5 mln yevroni tashkil etadi.

O‘z navbatida, “Roma” futbolchiga omad tiladi. U klub safiga 2021-yil avgustda qo‘shilgandi (o‘shandan beri sportchi Italiyaning “Kalyari” va “Spetsiya” klublarida ham ijara asosida o‘ynab qaytgan).