“Samarqand no‘xat sho‘ragi” geografik ko‘rsatkich – madaniy va hududiy o‘ziga xoslikni aks ettiruvchi intellektual mulk obyekti sifatida davlat ro‘yxatidan o‘tkazildi.

Adliya vazirligi matbuot xizmati xabar berishicha, tovarni muayyan geografik obyekt hududidan kelib chiqqan tovar sifatida identifikatsiyalovchi belgi geografik ko‘rsatkich deb e’tirof etilib, bunda tovarning sifati, nom qozonganligi yoki boshqa xususiyatlari uning geografik jihatdan kelib chiqishiga sezilarli darajada bog‘liq bo‘ladi.

Samarqand viloyati adliya boshqarmasi boshlig‘i Salohiddin Sattarov 3-iyun kuni viloyat hokimi vazifasini bajaruvchi Adiz Boboyevga “Samarqand no‘xat sho‘ragi” geografik ko‘rsatkich hujjatini topshirdi.

Ma’lumot uchun: geografik ko‘rsatkich – bu mahsulotning ma’lum hududga xosligi va aynan shu hudud tabiiy, insoniy, tarixiy omillari bilan bog‘liq alohida sifatlarga ega ekanini bildiruvchi intellektual mulk obyekti hisoblanadi.