“Manchester Siti” futbol klubiga egalik qiluvchi City Football Group (SFG) kompaniyasi O‘zbekistondagi futbol klublaridan birini sotib olish imkoniyatini ko‘rib chiqmoqda. Bu haqda O‘zbekiston Milliy olimpiya qo‘mitasi raisining birinchi o‘rinbosari Otabek Umarov juma kuni jurnalistlar bilan uchrashuvda ma’lum qildi.

“Abduqodir Husanov “Manchester Siti”ga o‘tganidan keyin uning muxlislari 100 milliontaga ko‘paydi. Bu esa shuni anglatadiki, O‘zbekistonda taxminan 37-38 million aholi bo‘lsa, O‘rta Osiyoning boshqa davlatlari ham aynan ushbu futbolchi sabab “Manchester Siti” jamoasini doimiy ravishda kuzatadigan muxlislar qatoriga qo‘shildi. Hozir ular yana futbolchimiz va O‘zbekistonning yana bir jamoasini holting tarkibiga qo‘shib olishni rejalashtirmoqda, dedi MOQ raisining birinchi o‘rinbosari Otabek Umarov.

“O‘zbekistonda 37-38 million xalqimiz bo‘lsa, O‘rta Osiyoning boshqa davlatlari ham shu futbolchimiz sabab „Manchester Siti“ jamoasini muntazam ravishda kuzatib borayotgan muxlislari qatoriga qo‘shilishdi”, – dedi Umarov.

Uning so‘zlariga ko‘ra, City Football Group’ning yana bir o‘zbekistonlik futbolchini taklif qilish va o‘zbek klubini xalqaro guruhga qo‘shish rejalari bor. “O‘zbekistondan bir sport klubini, ularning hozirgi guruhida 12 ta sport, futbol jamoasi bo‘lsa, 13-komandani, Xudo xohlasa, O‘zbekistondan olish niyatida yurishibdi”, – dedi u.

Umarovning ta’kidlashicha, avgust oyida O‘zbekiston delegatsiyasi Angliyaga tashrif buyurib, jamoa tayyorgarligi, seleksiya va o‘yinchilarni tayyorlash jarayoni bilan tanishishi rejalashtirilgan.

“Biz bir qator rejalarni belgilab oldik. Bu yo‘nalishda hali qiladigan ishlarimiz ko‘p”, – dedi MOQ raisining birinchi o‘rinbosari.