Raqobatni rivojlantirish va isteʻmolchilar huquqlarini himoya qilish qoʻmitasi tomonidan aksiyalar va chegirmalarni oʻtkazish tartibini takomillashtirish maqsadida Chakana savdo qoidalariga oʻzgartirishlar kiritish loyihasi ishlab chiqildi. Loyiha jamoatchilik muhokamasiga taqdim etildi.

Loyihaning maqsadi aksiyalar va chegirmalarni tashkil etish va oʻtkazishda isteʻmolchilar manfaatlarini himoya qilishni taʻminlashdan iborat.

Spirtli ichimliklar, pivo, vino, tamaki mahsulotlari va nikotin isteʻmoli uchun sotuvchilarga chegirmalardan foydalanish, shuningdek, ushbu mahsulotlarni ommalashtirish uchun aksiyalar oʻtkazish taqiqlanishi rejalashtirilmoqda.

Boshqa tovarlardagi aksiyalar va chegirmalarga esa yangi qoidalar joriy etish taklif etilmoqda – chegirma oldidan narx oxirgi 30 kun ichida amal qilgan eng past darajasida boʻlishi kerak. Narxlarni sunʻiy ravishda avval oshirib, keyin tushirish orqali chegirma bor degan yolgʻon taassurot uygʻotadigan amaliyotni taqiqlash rejalashtirilmoqda.

Loyihada, shuningdek, rejalashtirilgan aksiyalar, chegirmalar va qoʻshimcha toʻlovlar toʻgʻrisidagi maʻlumotlar soliq organlariga tadbir boshlanishidan 10 kun oldin taqdim etilishini belgilash taklif etiladi.

Bundan tashqari, loyihaga koʻra, sotuvchi tovarlar va narxlarning hisobini yuritishi, oxirgi 30 kun davomida amalda boʻlgan narxlarni qayd etishi va isteʻmolchining iltimosiga binoan ushbu maʻlumotlarni taqdim etishi shart. Agar chegirma taqdim etish isteʻmolchidan shaxsiy maʻlumotlarni uzatish yoki roʻyxatdan oʻtishni talab qilsa, sotuvchi shaxsiy maʻlumotlar toʻgʻrisidagi qonun hujjatlariga rioya qilishi va ushbu maʻlumotlarni qayta ishlashning maqsadlari va shartlari toʻgʻrisida xabardor qilishi shart.

Loyiha, shuningdek, aksiya oʻtkazishda sotuvchi quyidagilarga majbur boʻlishini taklif qiladi:

— isteʻmolchilarga aksiya shartlarini, shu jumladan, amal qilish muddatini, xarid qilish shartlarini, mahsulot nomlarini va boshqa muhim maʻlumotlarni aniq va tushunarli tarzda yetkazish;

— aksiya eʻlon qilinganidan keyin uning shartlarini oʻzgartirmaslik va narxlar toʻgʻrisida ishonchli maʻlumotlarni taqdim etish;

— chegirmalar, bonuslar va boshqa imtiyozlarning amalda qoʻllanishini taʻminlash;

— aksiya davomida yetarli miqdorda tovarlar zaxirasini saqlash.

Tovar narxiga chegirma qoʻllashda sotuvchi quyidagilarga majbur boʻladi:

— chegirma hajmini foiz yoki miqdor sifatida aniq koʻrsatish;

— isteʻmolchining soʻroviga koʻra chegirmaga qadar narx toʻgʻrisida maʻlumot berish;

— chegirma mahsulotning cheklangan miqdoriga taalluqli boʻlsa yoki mavsumiy omillar bilan bogʻliq boʻlsa, isteʻmolchilarni xabardor qilish;

— chegirmaning amal qilish muddati va uni qoʻllashning maxsus shartlarini aniq koʻrsatish.

Loyihada mazkur qoidalarni buzish Maʻmuriy javobgarlik toʻgʻrisidagi kodeks va Jinoyat kodeksiga muvofiq javobgarlikka sabab boʻlishi nazarda tutilgan.