24-iyun kuni Oʻzbekiston Respublikasi Oliy Majlisi Qonunchilik palatasining navbatdagi majlisi boʻlib oʻtdi. Unda yoqilgʻi-energetika sohasidagi huquqbuzarliklarga qarshi kurashish mexanizmlarini takomillashtirishga qaratilgan qonun loyihasi deputatlar tomonidan birinchi oʻqishda koʻrib chiqib, qabul qilindi.

Mazkur qonun loyihasi bilan:

- Ichki ishlar organlari va Favqulodda vaziyatlar vazirligi xodimlariga yoritish uchun elektr energiyasidan behuda xoʻjasizlarcha foydalanish huquqbuzarligi uchun maʼmuriy bayonnoma rasmiylashtirish vakolati berilmoqda;

- energiya resurslaridan behuda foydalanish bilan bogʻliq huquqbuzarliklar boʻyicha yakka tartibdagi tadbirkorlar ham maʼmuriy huquqbuzarlik subyekti sifatida belgilanmoqda;

- yakka tartibdagi tadbirkorlarning javobgarligi aniq belgilab qoʻyilmoqda;

- elektr energiyasi, gaz va suv tarmoqlariga qonunga xilof ravishda ulanib, ularni oʻgʻirlaganlik uchun javobgarlik choralari kuchaytirilmoqda;

- nazorat organi – Oʻzenergoinspeksiyaning vakolatlari aniqlashtirilmoqda.