Joriy yilning mart oyida Homay qoʻshigʻi bilan ommalashgan, etno-pop usulida ijod qiluvchi boshqirdistonlik Ay Yola guruhi Yola nomli qoʻshigʻiga Oʻzbekiston, Qozogʻiston, Yoqutiston va Boshqirdistonda suratga olingan klipini taqdim etdi. Klipni suratga olish ishlari mazkur mamlakatlarning noyob, goʻzal yerlarida amalga oshirilgan.

Xususan, tomoshabin Oʻzbekistondagi durdona meʼmoriy asarlari bilan qad rostlagan qadimiy Buxoro arxitekturasini ham koʻrishi mumkin. Keyingi kadrlar boʻlsa Qozogʻistonning bepoyon, ajoyib landshaftlari bilan hayratga soladigan Mangistauda suratga olingan. Yoqutistonning shimoliy goʻzalligi (Saxa-Yakutiya) klipga oʻzgacha atmosfera beradi. Ijodiy guruhning ona vatani boʻlmish Boshqirdiston boʻlsa oʻzining betakror manzarasi bilan klipga yakun yasaydi.

Klip You Tube platformasiga joylanganiga bor-yoʻgʻi 3 kun boʻlgan boʻlsa-da, koʻrishlar soni 835 mingdan oshgan.