16−17-iyun kunlari Qosim-Jomart Toqayevning taklifiga binoan Xitoy Xalq Respublikasi raisi Si Szinpin Qozog‘istonga keladi.

17-iyun kuni Ostona shahrida mintaqa davlatlari rahbarlari ishtirokida “Markaziy Osiyo — Xitoy” ikkinchi sammiti bo‘lib o‘tishi ham reja qilingan.

Sammitda O‘zbekiston, Qozog‘iston, Qirg‘iziston, Tojikiston va Turkmaniston prezidentlari, shuningdek, XXR raisi ishtirok etadi.

Bu formatdagi ilk sammit 2023-yil 18−19-may kunlari Sian shahrida bo‘lib o‘tgandi. O‘zbekiston prezidenti o‘z nutqida olti davlatning milliy rivojlanish strategiyasini bog‘lash, “yangi iqtisodiy muloqot”ni shakllantirish, o‘zaro bog‘liqlikni kuchaytirish va mintaqa davlatlarining 2030-yilga borib Xitoy bilan tovar ayirboshlash hajmini ikki baravar oshirishni taklif qilgan.