Qirgʻiziston sudi mamlakatning toʻrtinchi prezidenti Almazbek Atambayevni sirtdan 11,5 yilga ozodlikdan mahrum qildi. Bu haqda Kommersantʼ nashri xabar berdi. Atambayev shuningdek, barcha davlat mukofotlaridan mahrum etilib, bor mulki musodara qilinadi.

Sobiq prezident quyidagi jinoyatlarda aybdor deb topilgan:

- Qoʻy-Toshdagi yer uchastkalarni noqonuniy oʻzlashtirish va 2019-yil tartibsizliklar;

- Bishkek issiqlik elektrostansiyasini modernizatsiya qilishda korrupsiya;

- 2019-yil 7-8-avgust kunlari Qoʻy-Toshdagi tartibsizliklar uyushtirish.

Qirgʻizistonning joriy prezidenti Sadir Japarov Almazbek Atambayevni afv etish ehtimoli haqida gapirdi:

“Qoʻy-Toshdagi voqealarga olti yil boʻldi. Hammasi allaqachon tinchib boʻlgan. Agar u afv soʻrab murojaat qilsa, men uni kechirishim mumkin”, — deydi u.