Oʻzgidromet 4-maygacha boʻlgan ob-havo maʼlumotini eʼlon qildi.

Unga koʻra, bugun kunduzi Oʻzbekiston hududining katta qismida quruq ob-havo saqlanib turadi. Faqat Fargʻona vodiysida, shuningdek, togʻoldi va togʻli hududlarning baʼzi joylarida qisqa muddatli yomgʻir yogʻishi mumkin.

Havo harorati +29– +32 daraja atrofida, janubda va choʻl hududlarda +33– +35 darajada boʻladi.

Dam olish kunlari respublikaning barcha hududlari boʻyicha yogʻingarchiliksiz ob-havo kuzatiladi. Havo harorati koʻtarilishi davom etadi, kunduz kunlari havo +33– +35 darajagacha, janubda va choʻl hududlarda +37– +39 darajagacha isiydi.

“Bunday harorat may oyining boshiga qaraganda yoz mavsumi uchun koʻproq xosdir”, deyiladi xabarda.

Shamol sharqdan 7–12 m/s tezlikda esadi, shimolda va choʻl hududlarining ayrim joylarida 13–18 m/s gacha kuchayishi, baʼzi hududlarda chang-toʻzonlar bilan kuzatilishi mumkin.

Toshkent shahrida 2–4-may kunlari yogʻingarchilik kutilmaydi. Bugun kunduzi harorat +29– +31 daraja, shanba va yakshanba kunlari +32– +35 darajada boʻladi.