Madaniyat va sanʼatni rivojlantirish jamgʻarmasi Beruniy nomidagi YUNESKO-Oʻzbekiston xalqaro mukofotiga arizalar qabuli boshlanganini maʼlum qildi.

“Agar siz tadqiqot ishlari bilan shugʻullanayotgan, innovatsion yechimlarni ishlab chiqayotgan yoki sunʼiy idrok odob-axloqi sohasidagi izlanishlarga hissa qoʻshayotgan boʻlsangiz, jahon miqyosida eʼtirof etilish imkoniyatini qoʻldan boy bermang!”, deyiladi xabarda.

Taʼkidlanishicha, mukofot bilan ikki yilda bir marotaba 3 nafar sovrindor taqdirlanadi. Ularning har biri 30,000 AQSh dollari, “Beruniy” medali va sertifikat sohibi boʻladi.

Gʻoliblarni taqdirlash marosimi Samarqand shahrida YUNESKO Bosh konferensiyasining 43-sessiyasi doirasida boʻlib oʻtadi.

Arizalar 2025-yil 30-iyunga qadar qabul qilinadi.

Tanlovda qatnashishga talabgor boʻlganlar yuklab olingan ariza soʻrovnomasini toʻldirib, uni beruniy.prize@unesco.org elektron manziliga yuborishi soʻraladi.