Bugun, 9-aprel kuni tarmoqlarda Andijon viloyati, Kambagʻallikni qisqartirish va bandlikka koʻmaklashish boʻlimi boshligʻi oʻrinbosari psixotrop moddasini qabul qilayotgani aks etgan suratlar tarqaldi. Xabarlarda aytilishicha, mulozim ushbu moddani davlat idorasida, oʻz xizmat xonasida qabul qilgan.

Kambagʻallikni qisqartirish va bandlik vazirligi holat yuzasidan rasmiy munosabat bildirdi. Unga koʻra, mazkur holat huquq tartibot organlari tomonidan nazoratga olingan. Ayni paytda tegishli tartibda surishtiruvlar olib borilmoqda. Surishtiruv ishlari yakuniga koʻra, holatga batafsil izoh berilishi qayd etilgan.