Oʻzbekistondagi Islom sivilizatsiyasi markazi ekspozitsiyasida Amir Temur va temuriylarga alohida joy ajratilgan boʻlib, bunda ekspozitsiyaning jozibador va xalqaro talablarga mos keluvchi maskan boʻlishi kutilmoqda.

Ayni kunlarda markaz tomonidan tuzilgan bir guruh olimlar “Temur tuzuklari”ning qadimiy qoʻlyozmalari va nashrlarining nusxalari tayyorlab, toʻplamoqda.

Xabarga koʻra, “Temur tuzuklari” asosida Amir Temur davlatining maʼmuriy-hududiy boshqaruviga oid materiallar yaratilishi rejalashtirilgan.

Xalqaro Amir Temur jamoat fondi raisining soʻzlariga koʻra, ekspozitsiyada sohibqiron imperiyasining rangdor “smart” xaritasi va “Temur tuzuklari”ning oʻnlab nashrlari jamlanadi. Shuningdek, Amir Temur va temuriylarga oid koʻplab eksponatlar, buyuk sarkardaning xorijlik rassomlar tomonidan chizilgan, ammo hali keng jamoatchilikka maʼlum boʻlmagan suratlari ham namoyish etiladi.

Ilmiy-innovatsion loyihalar qator xalqaro hamkorlar bilan birgalikda amalga oshiriladi.