Temur Rahmonov Oʻzbekistonning Finlyandiyadagi elchisi etib tayinlandi. Bu haqda “Dunyo” AA xabar berdi.

Temur Rahmonov ushbu mamlakat Prezidenti Aleksandr Stubbga ishonch yorliqlarini topshirdi. Rasmiy tadbirdan soʻng oʻtkazilgan muloqotda Oʻzbekiston hamda Finlyandiya oʻrtasidagi ikki tomonlama hamkorlikning bugungi holati va istiqbollari muhokama qilindi.

Finlyandiya yetakchisi rasmiy Xelsinki va Toshkent oʻrtasidagi siyosiy muloqot hamda ikki tomonlama savdo-iqtisodiy hamkorlikning rivojlanib borayotganini yuqori baholab, Oʻzbekistonning mintaqadagi muhim oʻrnini qayd etdi va mamlakatimiz bilan siyosiy-iqtisodiy aloqalarni yanada rivojlantirishdan manfaatdorligini tasdiqladi.

Maʼlumot oʻrnida, Timur Rahmonov 2024-yil 13-mart kuni Oʻzbekistonning yangi tayinlangan elchisi sifatida Riga shahriga borgan edi. Ushbu lavozimga tayinlanishidan oldin u 2021-2024-yillarda mamlakatimizning Novosibirsk shahridagi bosh konsuli boʻlib ishlagan. 2024-yil 17-iyun kuni Oʻzbekiston elchisi sifatida Latviya Prezidenti Edgars Rinkevichsga, shuningdek, 2025-yil 11-fevral kuni Litvadagi elchi sifatida (qarorgohi Riga shahrida joylashgan) ushbu davlat Prezidenti Gitanas Nausedaga ishonch yorliqlarini topshirgan.