“Markaziy Osiyo - Yevropa Ittifoqi” formatidagi birinchi oliy darajadagi rasmiy uchrashuv yakunlangach, yetakchilar birgalikda Orol madaniyat sammiti ekspozitsiyasiga tashrif buyurdi, deb xabar beradi Prezident Shavkat Mirziyoyev matbuot xizmati.

Axborot matnida qayd etilishicha, koʻrgazmada Orol ekotizimini tiklash, hududning madaniy merosini asrab-avaylash va barqaror rivojlanishiga koʻmaklashishga qaratilgan noyob tashabbuslar namoyish etilgan. Ekspozitsiyada vizual, sensor va interfaol vositalar orqali Orolboʻyining tabiiy va madaniy boyligi bilan tanishish mumkin.

Koʻrgazmadan meʼmorchilik va landshaft fotografiyasiga ixtisoslashgan mashhur fotosuratchi Ivan Baanning asarlari, Qoraqalpogʻiston uchun xos oʻsimlik hisoblangan qamishdan yaratilgan floristik kompozitsiya, shuningdek, Orolboʻyining anʼanaviy mahsulotlari - saksovul urugʻi, chigʻanoqlar, tabiiy tuz, quritilgan isiriq, anʼanaviy naqshli namat va boshqa koʻplab eksponatlar oʻrin olgan.