Samarqand shahrida “Markaziy Osiyo — Yevropa Ittifoqi” birinchi sammiti oʻz ishini boshladi.

Tadbirni Oʻzbekiston Prezidenti kirish soʻzi bilan ochib bergan.

Prezident oʻz nutqi avvalida yigʻilish oldindan aytib boʻlmaydigan global jarayonlar sharoitida oʻtayotganini taʼkidlagan.

“Biz geosiyosiy keskinlik, xavfsizlik muammolari, yirik mintaqaviy mojarolar, barqaror rivojlanish yoʻlidagi ijtimoiy va iqtisodiy tahdidlar kuchayib borayotganiga guvoh boʻlmoqdamiz. Hech bir hudud bunday murakkab masalalarni keng xalqaro hamkorliksiz, mustaqil hal eta olmasligi aniq”, — degan davlat rahbari.

Shavkat Mirziyoyev, shuningdek, Markaziy Osiyo Yevropa tomonining xalqaro huquq prinsiplari va normalariga sodiqligiga qoʻshilishini urgʻulagan.

“Ukraina atrofidagi vaziyatni tinch yoʻl bilan hal etish boʻyicha muzokaralar jarayoni boshlanganini olqishlaymiz va toʻliq qoʻllab-quvvatlaymiz”, — degan Oʻzbekiston yetakchisi.

Prezident juda murakkab masalalarni hal qilish kerakligini tushunishini bildirar ekan, olib borilayotgan diplomatik saʼy-harakatlar va siyosiy qarorlardan boshqa muqobili koʻrinmayotganini maʼlum qilgan.