YUNESKOning Parijdagi bosh qarorgohida O‘zbekiston Respublikasi Hukumati va YUNESKO o‘rtasidagi kelishuv imzolanishiga bag‘ishlangan tantanali marosim bo‘lib o‘tdi, deb xabar berdi Saida Mirziyoyeva telegram kanalida.

Unga ko‘ra, Samarqand rasman Bosh konferensiyaning 43-sessiyasi o‘tkaziladigan joy sifatida belgilangan.

Mazkur konferensiya soʻnggi 40 yil ichida ilk marta Parijdan tashqarida boʻlib oʻtadi.

"Bu ijodiy industriyaning mashaqqatli mehnati, xalq diplomatiyasi va eng yuqori darajadagi kelishuvlar samarasidir. Bu – jahon hamjamiyatining mamlakatimiz ochiqligi, oʻziga xos an’analari va madaniy merosi, boy tarixi, musiqasi, adabiyotiga katta qiziqishi bilan qarayotganidan dalolat" – deydi Saida Mirziyoyeva.

Mirziyoyeva shuningdek, biz madaniyat va san’at vositasida mamlakatimizni xalqaro maydonda targ‘ib etib, dunyo ahliga yanada yaqinlashayotganimizni ta'kidlagan. Bu aloqalar bevosita iqtisodiy natijalarga ulanib, qo‘shma loyihalar va umumiy g‘oyalarga aylanayotgani qayd etilgan.