Vazirlar Mahkamasi huzurida Energiya samaradorligi milliy agentligi (keyingi oʻrinlarda Agentlik) tashkil etiladi. Bu toʻgʻrisida “Energiya samaradorligini oshirish sohasida davlat boshqaruvini takomillashtirish va energiya servis kompaniyalari xizmatlari bozorini rivojlantirish chora-tadbirlari toʻgʻrisida”gi qabul qilingan Prezident Farmoni (PF-63-son, 27.03.2025-y.)da qayd etildi.

Farmonda energiya samaradorligini oshirish sohasida yagona davlat siyosatini yuritish, sohada ragʻbatlantiruvchi va taʼsir etuvchi choralar ishlab chiqish va tartibga solish Agentlikning asosiy vazifalaridan biri etib belgilangan. Farmonda shuningdek, quyidagilar nazarda tutiladi:

- 2025-yil 1-iyuldan aholi uy-joylarining energiya auditini oʻtkazish xarajatlari hamda quyosh panellari va geliokollektorlar qiymatining 20 foizi va issiqlik nasoslari (havo, suv va geotermal) qiymatining 40 foizini, lekin BHMning 50 baravaridan oshmagan miqdorda qoplash uchun Agentlik tomonidan subsidiya ajratiladi.

- 2025-yil 1-sentyabrgacha Energiya samaradorligini oshirish raqamli platformasi ishga tushiriladi.

- Agentlik huzurida byudjetdan tashqari Energiya samaradorligini ragʻbatlantirish va qoʻllab-quvvatlash jamgʻarmasi tashkil etiladi.

- 2025-yil 1-oktyabrga qadar ishlab chiqaruvchilar va import qiluvchilar uchun texnologiyalar energiya samaradorligining “yashil” standartlari joriy etiladi.