14-martdan poytaxt avtobuslarida chiptasiz yurganlarni jarimaga tortish amaliyoti boshlandi. Bu haqda Transport nazorati inspeksiyasi xabar berdi.

Xabaringiz bor, Toshkent shahri jamoat transporti avtobuslarda naqd pulni qabul qilish amaliyotidan to‘liq voz kechilgan. Yo‘l haqi elektron shaklda yoki bir martalik QR-chiptalar yordamida amalga oshirilishi zarur.

Ushbu amaliyot mohiyati, qulayligi va tejamkorligi bo‘yicha Transport nazorati inspeksiyasi, Toshkent shahar jamoat transportini monitoring va nazorat qilish davlat muassasasi xodimlari, shuningdek, OAV va ijtimoiy tarmoqlar orqali muntazam ravishda targ‘ibot-tashviqot ishlarini olib borgan.

Yo‘lovchilar orasida to‘lovlarni o‘z vaqtida amalga oshirib, tizim qulayligini e’tirof etayotganlar bilan birga, yo‘l haqini hech qanday asossiz to‘lamay avtobusdan tushib ketayotglar ham tez-tez uchrab turgani qayd etilgan.

Shu kabi holatlar yuzasidan inspeksiya va Toshkent shahar jamoat transportini monitoring va nazorat qilish davlat muassasasi xodimlari tomonidan Toshkent shahridagi avtobuslarda kuchaytirilgan reyd tadbirlari boshlangan.

Ta'kidlanishicha, yo‘lovchilar yo‘l haqini bir martalik QR-chiptalar yordamida amalga oshirishganda safar davomida QR-chiptalarni o‘zlarida saqlab qolishi hamda nazoratchi va inspektorlarining so‘roviga asosan ularga ko‘rsatishlari lozim.

Rasmiy axborot matnida shuningdek, Ma’muriy javobgarlik to‘g‘risidagi kodeksning 144-moddasi 5-bandiga asosan yo‘lovchining shahar ichida va shahar atrofiga qatnaydigan avtobusda chiptasiz yurishi bazaviy hisoblash miqdorining o‘ndan bir qismi miqdorida jarima solishga sabab bo‘lishi eslatib o‘tilgan.