4-aprelga qadar YUNESKOning Parijdagi bosh qarorgohida Markaziy Osiyodagi ilk professional fotosuratchi va kinooperator Xudoybergan Devonovga bagʻishlangan koʻrgazma boʻlib oʻtadi. Bu haqda Saida Mirziyoyeva oʻz sahifasida maʼlum qildi.

“Hayratlanarli zakiylik va nozik badiiy did sohibi boʻlgan Devonov nafaqat insonlar va voqealar, balki zamon ruhini ham tasmalarga muhrlab, oʻz davrining chinakam solnomachisiga aylanishga muvaffaq boʻlgan. Uning sezgir nigohi va oʻz kasbiga boʻlgan teran ishtiyoqi sharofati bilan bugun biz jonli tarixga nisbatan daxldorlik hissini tuya olamiz”, deb yozadi Prezident yordamchisi.

Maʼlumot uchun, mazkur koʻrgazma Oʻzbekiston Madaniyat va sanʼatni rivojlantirish jamgʻarmasi tomonidan tashkil etilayotgan boʻlib, unda butun bir davrning tasviriy solnomasiga aylangan 34 ta betakror fotosurat namoyish etiladi.