Oʻzbekiston tarixida ilk bor Yasmina Xusniddinova Italiyadagi nufuzli Sanremo Junior koʻrik tanlovida Gran-pri sohibasiga aylandi. Bu haqda xonanda Didjey Piligrim ijtimoiy tarmoqdagi sahifalarida xabar berdi.

Sanremo Junior-2025 xalqaro bolalar qoʻshiqlari tanlovi 26-mart kuni Italiyadagi mashhur Ariston teatrida boʻlib oʻtdi. Ushbu bellashuvda 25 mamlakatdan 6 yoshdan 15 yoshgacha boʻlgan yakkaxon yosh isteʼdodlar 32 kishilik orkestr hamrohligida jonli ijroda bahslashgan. Tanlov natijalari 30-mart kuni eʼlon qilingan.

Yasmina Xusniddinova xalqaro tanlovga qanday yetib borgan?

Yasmina Xusniddinova “Ovoz“ bolalar shousining 1-mavsumida Didjey Piligrim boshchiligidagi jamoada finalgacha yetib kelib, muxlislar ovozi bilan 3-oʻrinni egallagan. Taʼkidlanishicha, mazkur mavsum ishtirokchilarining barchasining roʻyxati Italiyadagi xalqaro tanlov uchun yuborilgan. Biroq saralash jarayonida faqatgina Yasmina Xusniddinova tanlab olingan.

26-mart kuni final bahslari oldidan Yasminani qoʻllab-quvvatlash uchun Italiyaga uning “Ovoz” loyihasidagi ustozi Didjey Piligrim taxallusi bilan ijod qiluvchi Ilhom Yoʻlchiyev ham yetib keladi. Jarangdor ovoz bilan sahnadagi mahoratni uygʻunlashtirgan Yasmina SANREMO JUNIOR-2025 xalqaro tanlovining yagona oliy mukofoti — Gran-pri sohibasiga aylandi. Oʻzbekiston sharafini munosib himoya qilgan Yasmina dunyo musiqa ixlosmandlarini larzaga soladi. Taqdirlash marosimidan keyin tanlovda Yasminaga muxlislik qilganlar u va ustozi bilan esdalik suratlarini kadrlarga muhrlash uchun uzun navbatlar hosil qilgan.

Didjey Piligrim oʻquvchisi raqobatsiz gʻoliblikka erishganini aytdi:

“Madinaxon, molodes! Yasminaxon, molodes! Madina bizning Yasminochkaning oʻqituvchisi. U tufayli biz shunday natijaga erishdik. Olgʻa, yangi Oʻzbekiston! Yasmina raqobatsiz yutdi! Mana bu inson, prezident Paulo Alberto raqobatsiz gʻolib boʻldi, dedilar va Yasminadan sahnada yana bir bor kuylab berishini soʻradilar” — deydi Ilhom Yoʻlchiyev.

Boshqa manbalarda boʻlsa, Yasmina ikkinchi oʻrinni olgan raqibidan 1 ball ustunlik bilan birinchi oʻrinni egallagani qayd etilib, kurash oson kechmagani taʼkidlanadi.

Oʻzbekistonliklar Yasminani koʻtarinki kayfiyatda kutib oldi.