Oʻzbekistonga shanba va yakshanba kunlari respublikaning gʻarbiy hududlaridan nam va nisbatan salqin havo massalari kirib kelishi boshlanadi. Bu haqda “Oʻzgidromet” xabar berdi.

Maʻlum qilinishicha, 22-23-mart kunlari Qoraqalpogʻiston Respublikasi, Xorazm, Buxoro, Navoiy viloyatlarining baʻzi joylarida yomgʻir yogʻadi. Ayrim togʻli hududlarda ham yomgʻir yogʻadi, baland togʻlarda bu qorga aylanadi.

Respublikaning qolgan hududlarida quruq ob-havo boʻlishi kutilmoqda. Ushbu kunlarda havo harorati asta-sekin pasayadi va 22-27 daraja iliqni tashkil etadi.

Sharqiy shamol yoʻnalishini oʻzgartirib, gʻarbdan 7-12 metr/sekund tezlikda esadi, baʻzi joylarda 13-18 metr/sekundgacha kuchayadi.

Toshkentda dam olish kunlari yogʻingarchilik kutilmaydi. Harorat asosan kechalari 12-14 daraja iliq, kunduz kunlari 26-28 daraja iliq boʻladi.

Navroʻz bayrami qulay ob-havo sharoitida oʻtadi, faqat respublika shimolida baʻzi joylarda yomgʻir yogʻadi. 21-25-mart kunlari kutilayotgan yogʻingarchilik hamda havo haroratining oʻzgarishi sabab Qashqadaryo, Surxondaryo, Samarqand, Jizzax, Toshkent va Namangan viloyatlarida qor koʻchish xavfi eʼlon qilingan.