Korrupsiyaning oldini olish boʻyicha ishlar natijadorligi va kelgusidagi ustuvor vazifalarga bagʻishlangan kengaytirilgan yigʻilishda Prezident hashamatli toʻy va dabdabalarni tanqid qildi:

“Korrupsiyani yengish uchun birinchi navbatda uning ortiqcha hashamat va dabdaba degan “oʻq ildizlarini” quritishimiz shart. Eng achinarlisi, bunga taniqli shaxslar bosh-qosh boʻlayapti, odamlar ularga tenglashaman deb, oʻzini “oʻtga-choʻgʻga” urayapti. Bu borada ayrim rahbarlar oʻzining kamtarona turmush tarzi bilan barchaga namuna boʻlish oʻrniga, bunday soxta qadriyatlar asiriga aylanib, noqonuniy daromad topishga intilayotgani ham bor gap”, - dedi Prezident.

Shu bois davlatimiz rahbari parlament palatalari, mahalliy kengashlar, jamoatchilik vakillari, mahalla raislari, nuroniylarni bu masalaga bosh-qosh boʻlib, aholi orasida tushuntirish ishlarini kuchaytirishga chaqirdi.