“Oila va gender” ilmiy-tadqiqot instituti oilani nizodan saqlash boʻyicha eʼtibor qaratish lozim boʻlgan bir qator jihatlarni maʼlum qildi.

Taʼkidlanishicha, oilaviy nizolar koʻpincha quyidagi sabablar tufayli yuzaga keladi:

▪️ Kommunikatsiya muammolari – Oila aʼzolari oʻrtasida notoʻgʻri yoki yetarlicha samarali muloqotning yoʻqligi nizo chiqishiga olib kelishi mumkin. Agar odamlar oʻz fikrlarini toʻgʻri ifoda eta olmasa yoki bir-birlarini toʻliq tushunmasa, tushunmovchiliklar va ziddiyatlar yuzaga keladi.

▪️ Resurslar va majburiyatlarni taqsimlashdagi kelishmovchiliklar – Oila ichidagi moliyaviy, uy-joy yoki vaqt resurslarini taqsimlashda kelishmovchiliklar, masalan, uy ishlari, bolalar tarbiyasi yoki iqtisodiy masalalar haqida kelishmaslik oilaviy nizo sababchisi boʻlishi mumkin.

Mazkur keltirilgan omillar psixologik kuzatuvlar bilan isbotlangan.

Institut tadqiqotchilarining taʼkidlanishicha, bunday sabablar birgalikda yoki alohida tarzda oiladagi muammolarni keltirib chiqarishi mumkin, lekin yaxshi muloqot va kelishuvlar bu masalalarni hal qilishda yordam beradi.

Xabarda, shuningdek, oilaviy nizolarning oldini olish uchun baʼzi psixologik tavsiyalar ham berilgan:

▪️ Ochiq muloqot – oila aʼzolari oʻrtasida ochiq va samimiy suhbatlar oʻtkazish juda muhim;

▪️ Empatiya(boshqalarning his-tuygʻularini tushunish va baham koʻrish qobiliyati)ni rivojlantirish – har bir oila aʼzosi bir-birining his-tuygʻularini tushunishga harakat qilishi kerak;

▪️ Qarorlarni birgalikda qabul qilish – Oila ichidagi qarorlar birgalikda, hamma aʼzolarining fikri inobatga olinib, qabul qilinishi kerak.

“Unutmang, hurmat va tushunish oila tinchligi uchun juda muhim”, deyiladi xabarda.