Oʻzgidromet 10–14-fevral kunlari uchun ob-havo maʼlumotini eʼlon qildi.

Unga koʻra, ushbu haftaning birinchi yarmida Oʻzbekiston hududi nam va nisbatan sovuq havo massalari taʼsiri ostida boʻladi. Respublika boʻyicha vaqti-vaqti bilan, asosan, qor koʻrinishidagi yogʻingarchilik boʻlishi kutilmoqda.

13-fevral kuni markaziy va sharqiy viloyatlarning ayrim joylarida, shuningdek, Oʻzbekistonning choʻl hududlarida ham yogʻingarchilik (yomgʻir, qor) boʻladi.

14-fevralda esa respublikaning koʻpchilik viloyatlarida yogʻingarchilik kutilmaydi. Faqat janubiy hududlarning baʼzi eng chekka joylarida biroz yomgʻir yogʻishi mumkin. Togʻoldi va togʻli hududlarda ham yogʻingarchilik (yomgʻir, qor) boʻladi.

Havo harorati 10–11-fevralda kunduz kunlari 0–5 daraja iliq, kechalari 0–5 daraja sovuq, shimol va choʻl hududlarning baʼzi joylarida boʻlsa 6–8 daraja sovuqqacha boʻladi.

12-fevraldan harorat asta-sekin koʻtarila boshlaydi va 13–14-fevralga kelib, kunduzgi harorat 8–11 daraja iliqqacha, janubda 12–14 daraja iliqqacha koʻtariladi.

Gʻarbiy shamol yoʻnalishini oʻzgartirib, sharqdan 7–12 m/s tezlikda esadi. Ayrim joylarda 15-20 m/s gacha kuchayadi.

Respublika boʻyicha baʼzi joylarga tuman tushadi.

Toshkent shahrida bugun kechqurun biroz qor yogʻishi mumkin. 11–12-fevral kuni vaqti-vaqti bilan asosan qor koʻrinishidagi yogʻingarchilik boʻladi. 13-fevralda, asosan, yomgʻir koʻrinishidagi biroz yogʻingarchilik boʻlishi kutilmoqda. 14-fevralda yogʻingarchilik kutilmaydi.

Havo harorati kechalari 3 daraja sovuq–2 daraja iliq, kunduz kunlari 10–11-fevralda 0–5 daraja iliq boʻladi. 12–14-fevral kunlari 8–10 daraja iliqqacha asta-sekin koʻtariladi.

Kechasi va ertalab tuman tushishi mumkin. Gʻarbiy shamol yoʻnalishini oʻzgartirib, sharqdan 3–8 m/s tezlikda esadi.