Oʻzbekiston Respublikasi elchixonasi joriy yilning 5-fevralidan boshlab Rossiya Federatsiyasi hududida Rossiya Federatsiyasi ichki ishlar vazirligi tomonidan yuritiladigan “nazorat qilinadigan shaxslar reyestri” faoliyat koʻrsatishni boshlaganini maʼlum qildi.

Xabarga koʻra, ushbu reyestrga migratsiya qonunchiligi sohasida maʼmuriy huquqbuzarlik sodir etgan chet el fuqarolari kiritilgan.

Mazkur meʼyoriy hujjatga muvofiq, reyestrga kiritilgan chet el fuqarolari Rossiya Federatsiyasidan chiqib ketishlari yoki 2025-yil 1-yanvardan 30-aprelgacha boʻlgan davrda oʻzlarining huquqiy maqomlarini hal qilish uchun oʻzlari istiqomat qilib turgan joydagi Rossiya ichki ishlar vazirligining hududiy organiga yoki “PVS” (паспортно-визовый сервис) federal davlat unitar korxonasining filialiga, shuningdek, Moskva shahrida joylashgan chet elliklar uchun “Сахарово” koʻp funksiyali migratsiya markaziga murojaat qilishlari talab etiladi.

Rossiya tomoni maʼlumotiga koʻra, “Amnistiya” davrida ushbu Farmonga binoan, chet el fuqarolariga nisbatan Rossiya Federatsiyasi hududidan chiqarib yuborish, maxsus saqlash muassasalarga joylashtirish va keyinchalik Rossiya Federatsiyasi hududiga kirishni cheklash bilan bogʻliq choralar qoʻllanilmasligi taʼkidlanmoqda.

Nazorat qilinadigan shaxslar reyestriga kiritilgan chet el fuqarolariga quyidagilar taqiqlanadi:

1. Koʻchmas mulk va transport vositalarini sotib olish va roʻyxatdan oʻtkazish;

2. Nikoh tuzish;

3. Yuridik tashkilot yoki firmalarni tashkil etish va yakka tartibdagi tadbirkor sifatida roʻyxatdan oʻtish;

4. Bank hisob raqamlarini ochish va bank operatsiyalarini bajarish;

5. Transport vositalarini boshqarish.

Bundan tashqari, Rossiya Federatsiyasi hududida noqonuniy yurgan voyaga yetmagan chet el fuqarolarini taʼlim muassasalari (maktablar va bolalar bogʻchalari)ga qabul qilish ham mumkin emas.

Elchixona salbiy oqibatlarning oldini olish maqsadida Rossiya Federatsiyasi hududida noqonuniy ravishda boʻlgan Oʻzbekiston Respublikasi fuqarolarini huquqiy holatni zudlik bilan hal etish choralarini koʻrishga chaqirmoqda.

Maʼlumot uchun, Oʻzbekiston fuqarolari huquqiy maqomini Rossiya ichki ishlar vazirligining rasmiy veb-saytida tekshirib olishi mumkin.